Ухаалаг, аюулгүй, энгийн SWYP
Төлбөрийн карт, бэлгийн карт гээд олон төрлийн карт таны түрүүвчийг зузаан болгоод байна уу? Тэгвэл тэр бүхнийгээ ганцхан карт болговол ямар санагдаж байна?
Ганцхан төмөр картаа бүх төрлөөр ашиглаж болно.
Дэвшилтэт технологийн ачаар олон тооны картыг ганцхан болгодог төрөл бүрийн үйлчилгээ, төхөөрөмж худалдаанд гараад чамгүй удаж байна. Гэсэн хэдий ч энэ төрлийн зах зээл дээр сул орон зай байсаар байгаа билээ.
Тэгвэл Swyp гэх төмөр карт энэ зах зээлийн сул орон зайг дүүргэхээр орж иржээ. Карт уншдаг дагалдах төхөөрөмжийг нь өөрийнхөө утасны чихэвчийн оролтод залгаад байнга хэрэглэдэг картуудаа уншуулахад л хангалттай.
Ингээд уншуулчихсаны дараа таны картууд дээрх бүхий л мэдээлэл тусгай аппликейшнд хадгалагдаж та ганцхан төмөр картаа бүх төрлөөр ашиглаж болно. Дэлгүүрээс юм худалдаж авах, ресторанд тооцоогоо хийх, ATM-ээс бэлэн мөнгө авах гээд.
Үүнтэй ижил төрлийн Coin гэх ухаалаг карт нэг дор найман өөр төрлийн картын мэдээллийг санадаг бол Swyp 25 картын мэдээллийг өөртөө агуулж чадна. Тэгвэл та картаа мартчихвал яах вэ?
Компанийн тайлбарласнаар хэрвээ карт болон таны утас хоёрын хоорондын зай 2 метрээс хэтэрвэл шууд идэвхгүй болох бөгөөд таны утсанд сануулга ирнэ. Түүнчлэн дахин цэнэглэж болдог аж.
